講到叫『月經』,當然應該是每個月來一次才稱得上月經。但原來有D情況唔黎其實係正常,例如:懷孕準媽媽、授乳中的媽媽,呢。所以病人黎到診所我地都會詳細詢問她們『最後一次月經幾時黎?!』、『上次月經黎血量多唔多、顔色有無異常、有無血塊或者有無其他身體部位唔舒服..等等?!』。目的是為左了解病人o既身體情況,究竟係因為生理性停經,抑或是病理性停經,好等我地中醫掌握病情然後準確用藥。

坊間有好多古老道聽途說的說法講煲咩湯可以黎經,有D老人家話八珍湯、又有D話燉隻雞,食下雪蛤膏等。有陣時有D病人黎到診所,第一句就問我地煲D 咩湯可以黎返月經。首先,我地一般都唔會建議病人胡亂煲湯,因為煲錯湯不但浪費心力,而且影響自己體質就得不償失;其次,調經還是以內科藥或者針灸配合治療較為合適。

中醫理解月經不來病因大致主要有以下分類:

  1. 氣血虛弱
    通常血虛o既人都會出現面黃黃,面青青,成日見暈,脈又沉又無力,每次月經越黎越少。
  2. 氣滯血瘀
    一般氣滯o既人都會有以脹為主的表現,包括腹脹、而伴有乳脹、胃脹等等,氣行不暢血瘀內停而終導致月經不來。
  3. 寒凝血瘀
    寒凝,或者我概括D講『寒底』可能大家會較容易理解,普遍手腳冰冷,腹冷宮寒,而使血寒凝滯導致月經不來。
  4. 肝腎不足
    一些勞累過度,或先天不足,又或者腎氣未盛,精氣未充,中醫觀點上有個叫『天癸』的東西不能應時泌至,使衝脈不盛,任脈不通,終致月經不來。
  5. 痰濕阻滯
    普遍體型較胖o既人,所謂『肥人多痰濕』,正因如此中醫觀點上多考慮痰濕內盛的體質。女性變肥發脹其實原因有好多種,所以機理亦可以好覆雜,否則纖體中心都唔會通街都有的。有些人因為愛吃零食小吃,有些人因為長期服用荷爾蒙等西藥,亦有些人因為缺乏運動…….等等。中醫睇法是當痰濕內聚,阻滯衝任,胞脈閉而月經不來。

以下分享一個閉經治療病例:
已婚女性 27歲
婚後2年一直未能懷孕,心情低落。1年前月經未行,以為懷孕,但及後測HCG(-),家人以為她體質血虛導致月經未能按時到來,故自行煲服烏雞八珍湯服用,但月經一直未有到來。半年前前來就診,近半年來頭暈目眩,心情郁悶,飯後噯氣胃脹難消,眠差,脈微而尺沉澀。檢查內分泌檢查發現催乳素高於正常值後,及後再排除垂體及甲狀線問題,西醫再三叮囑患者不能再中藥,但患者仍然想繼續以中藥調經。中醫看法此屬肝郁脾虛的閉經。

  • 一診

    柴胡 麥芽 川芎 白芍 陳皮 制香附 知母 黃柏 熟地 山茱萸 山藥 澤瀉 茯苓 牡丹皮 炙甘草
    5劑
  • 二診
    月經仍未行,頭暈減,噯氣矢氣增,大便不爽感改善,仍然眠差易醒,心情情緒反覆。

    柴胡 麥芽 川芎 白芍 陳皮 制香附 知母 熟地黃 白朮 澤瀉 茯苓 牡丹皮 生薑 鬱金 炙甘草
    7劑
  • 三診
    月經仍未行,但出現少量分泌物,下腹有微弱痠痠痛,頭暈止,噯氣減退,大便可,眠仍差但精神可,但此藥後有少量皮膚敏感風團。

    柴胡 麥芽 川芎 白芍 陳皮 制香附 知母 生地黃 白朮 茯苓 牡丹皮 生薑 桂枝 夜交藤 炙甘草
    7劑
  • 四診
    月經仍未行,分泌物增加伴少量血絲,下腹脹痛似月經將至,皮膚敏感消退。

    柴胡 麥芽 川芎 白芍 陳皮 制香附 生地黃 白朮 生薑 桂枝 益母草 牛膝 三棱 莪朮
    7劑
  • 五診
    前診分泌物消失,血絲亦只出現2-3天後未有再見,下腹脹痛消失,月經至今未來。
    柴胡 麥芽 川芎 白芍 陳皮 制香附 知母 黃柏 熟地 山茱萸 山藥 澤瀉 茯苓 牡丹皮 炙甘草
    14 劑
  • 六診
    月經仍未行,分泌物又再增加伴少量血絲,下腹脹痛亦再現月經將至的表現,

    柴胡 麥芽 川芎 白芍 陳皮 制香附 生地黃 白朮 生薑 桂枝 益母草 牛膝 三棱 莪朮
    7劑
  • 七診
    月經已去,4天可淨,量較以往少,伴少量血塊
    柴胡 麥芽 川芎 白芍 陳皮 制香附 知母 黃柏 熟地 山茱萸 山藥 澤瀉 茯苓 牡丹皮 炙甘草
    10劑

按:患者及後日子月經前後用藥,基本月經回恢正常。
以上病例並非以八珍湯之類大補氣血的方向處理閉經,只是以疏肝理脾調順月經週期。很多時西醫叮囑病人不能服中藥o既背後意思,其實係由於佢地臨床上見到很多患者胡亂自行中藥所導致。

中醫治療閉經有好多方法,唔一定只有補,我們會因應患者唔同的病因病機而去治療,我們通常稱為『辨證施治』。

所以如有任何疑問請教先你的家庭中醫師。大家千萬唔以為煲湯就能醫百病,到最煲湯治療唔到疾病,就認為中藥無效果。其實好多時都係自己用錯方法罷了。

發表回覆

你的電郵地址並不會被公開。 必要欄位標記為 *